नेपाली लेखक सङ्घको अध्यक्षमा वियोगी बुढाथोकी

लुम्बिनी (मर्चवार), १७ चैतः नेपाली लेखक सङ्घको अध्यक्ष पदमा वियोगी बूढाथोकी विजयी हुनुभएको छ । केही बेरअघि सम्पन्न मतगणनामा बुढाथोकीले ११५ मत प्राप्त गरी विजयी हुनुभएको जनाइएको छ । उहाँका प्रत्यासी डा रत्नमणि नेपालले ५९ मत प्राप्त गर्नुभयो ।

सङ्घको सहअध्यक्षमा मनोज न्यौपानेले १०२ मत प्राप्त गरी विजयी हुनुभयो । उहाँका प्रतिस्पर्धी डा शैलेन्दु प्रकाश नेपालले ६९ मत प्राप्त गर्नुभयो । महासचिवमा सोझो गाउँलेले १२६ मत प्राप्त गरी विजयी हुँदा प्रतिस्प्रर्धी प्रकाश विमिलले ४९ मत प्राप्त गर्नुभयो । सङ्घको आठौँ राष्ट्रिय अधिवेशनमा कूल ३९ पदका लागि ४६ जनाले उम्मेदवारी दिनुभएको थियो । त्यसमध्ये छ उपाध्यक्ष, एक उपमहासचिव, एक कोषाध्यक्ष, चार सचिव र २४ सदस्य पदमा एकल उम्मेदवारी दर्ता भएकाले उहाँहरू स्वतः निर्विरोध निर्वाचित हुनुभयो । सङ्घको उपाध्यक्षमा दामु मर्सिफुल, डा ईश्वरमणि अधिकारी, डा विष्णु केसी र डा शशि थापा पण्डित, कोषाध्यक्षमा विसुकुमार केसी, उपमहासचिवमा नारायण सापकोटा, सचिवमा निर्मल ढुङ्गाना, डा लोकेन्द्रबहादुर खड्का, मिलन समीर र निर्मला कोइराला निर्वाचित हुनुभएको निर्वाचन संयोजक धर्मेन्द्र नेम्वाङले बताउनुभयो । निर्वाचनमा कूल १८२ जनामध्ये १७६ जनाले मतदान गर्नु भएको थियो ।