लोकतन्त्रलाई सुदृढ बनाऔँ’

भीमफेदी, ११ वैशाखः बागमती प्रदेशका प्रदेश प्रमुख दीपकप्रसाद देवकोटाले नेपाली जनताको लामो सङ्घर्ष, बलिदान र त्यागबाट प्राप्त लोकतन्त्र गौरवको धरोहर हो भन्नुुभएको छ । साथै उहाँले लोकतन्त्रलाई सुदृढ बनाउनुपर्नेमा जोड दिनुभएको छ । लोकतन्त्र दिवसका अवसरमा आज एक शुभकामना सन्देश जारी गर्दै उहाँले लोकतान्त्रिक मूल्यको संरक्षण र समृद्ध राष्ट्र निर्माणमा सबैलाई एकजुट हुन आग्रह गर्नुभएको छ । प्रदेश प्रमुख देवकोटाले लोकतन्त्र स्थापनामा जीवनको आहुति दिने महान् सहिदहरूप्रति उच्च सम्मान व्यक्त गर्दै हार्दिक श्रद्धाञ्जली अर्पण गर्नुभएको छ । सन्देशमा उहाँले आम जनतालाई आफ्ना विचारभन्दा माथि उठेर राष्ट्रहित र जनकल्याणमा योगदान दिन लोकतन्त्र दिवसले सम्पूर्ण राजनीतिक दल, नागरिक समाजलाई प्रेरणा दिने विश्वास व्यक्त गर्नुभएको छ । –––