डिजिटल नेपाल फ्रेमवर्क कार्यान्वयनमा सहजीकरण आवश्यकः सञ्चारमन्त्री गुरुङ
काठमाडौं, १७ चैत – सञ्चार तथा सूचना प्रविधिमन्त्री पृथ्वी सुब्बा गुरुङले डिजिटल नेपाल फ्रेमवर्क को लक्ष्य प्राप्तिका लागि सहजीकरण आवश्यक रहेको बताउँदै मन्त्रालय मातहतका निकायहरूलाई प्रभावकारी कार्यान्वयनमा जुट्न आग्रह गरेका छन्।सञ्चार तथा सूचना प्रविधि मन्त्रालयले आयोजना गरेको विषयगत समितिको बैठकमा मन्त्री गुरुङले डिजिटल नेपाल फ्रेमवर्कलाई सफल बनाउन सबै स्थानीय तहमा विद्युत्, टेलिफोन, र इन्टरनेट पहुँच सुनिश्चित गर्नुपर्ने बताए।
सञ्चार तथा सूचना प्रविधि मन्त्रालय विद्युतीय सुशासन कायम गराउने प्रमुख निकाय भएकाले यसअन्तर्गतका संस्थाहरूले आफ्नो जिम्मेवारी इमानदारीपूर्वक पूरा गर्नुपर्ने उनको भनाइ थियो।
उनले एकीकृत कार्यालय व्यवस्थापन प्रणाली (GIOMS) विस्तार, विज्ञापन चुहावट नियन्त्रण, हुलाक सेवाको डिजिटलाइजेसन, सरकारी वेबसाइटहरूको एकरूपता ल्याउने कार्यलाई तीव्रता दिन निर्देशन दिए। साथै, नागरिक एप साक्षरता अभियान सञ्चालन गर्न आवश्यक रहेको उल्लेख गर्दै ब्रोडब्यान्ड सेवा विस्तारलाई प्राथमिकता दिनुपर्नेमा जोड दिए।
मन्त्री गुरुङले मोबाइल टावर निर्माणमा स्थानीय तहले थप कर लगाउँदा पूर्वाधार निर्माणमा आर्थिक भार बढेको धारणा राखे। साथै, समुदायिक विद्यालयमा ब्रोडब्यान्ड विस्तार र भूकम्प प्रभावित आठ जिल्लामा इन्टरनेट सेवा स्तरोन्नति गर्नुपर्ने बताए।
सञ्चार मन्त्रालयका सचिव राधिका अर्यालले नीतिगत तथा कानुनी तर्जुमा गर्दा प्रदेश तथा स्थानीय तहसँग समन्वय आवश्यक रहेको बताइन्। क्षेत्रगत योजना, नीति तथा कार्यक्रममा एकरूपता र गुणस्तर कायम गर्नुपर्नेमा उनले जोड दिइन्।
मन्त्रालयका सहसचिव कोशहरि निरौलाले स्थानीय, प्रदेश, र संघीय सरकारबीच समन्वय गर्दै डिजिटल नेपाल फ्रेमवर्कको लक्ष्य पूरा गर्न मन्त्रालयले निरन्तर कार्य गरिरहेको जानकारी गराए।